Tarea 🇧🇸 Historia di Bahamas: Di Columbus te na libertad 🏝️ (Resúmen)
🧭 E yegada di Cristóbal Colón
Na 1492, Cristóbal Colón a yega na un isla di Bahamas cu tabata yama Guanahani. Awendia e isla aki ta conoci como San Salvador.
Promé cu Colón a yega, tabatin hende indígena cu tabata biba riba e isla.
E biahe aki tabata cuminsamento di un periodo nobo di biahenan di descubricion di e Europeonan na America. E Europeonan tabata yama America e “Mundo Nobo”.
E yegada di e Europeonan a cambia bida di e hendenan di e islanan pa semper.
☠️ E tempo di piratanan
Durante e siglonan 17 y 18, Bahamas tabata un lugar popular pa piratanan.
Tabatin hopi isla y lugarnan den laman caminda e awa no tabata profundo. Pesey e piratanan por a sconde nan barconan y ataca otro barco.
Un pirata masha famoso tabata Blackbeard (Barba Preto).
Den e tempo ey, Nassau tabata conoci como e “Republica di Piratanan”.
🔓 Fin di slabernia
Na 1834, Imperio Britanico a cuminsa cu e abolicion di slabernia. Esaki a pasa na Bahamas tambe.
Hopi hende cu tabata esclavisá mester a sigui traha algun aña mas durante un periodo di transicion.
Na 1838, nan a haya nan libertad completo.
Despues, hopi hende cu antes tabata esclavisá a cuminsa traha nan mes pueblonan.
E pueblonan aki tabata conoci como “Pueblonan di Libertad”.
E famianan a traha nan mes casnan, planta cuminda y cuminsa un bida nobo den libertad.
🎉 Dia di Emancipacion
Tur aña, na Bahamas nan ta celebra Dia di Emancipacion riba e promé dialuna di augustus.
Ta un dia di fiesta nacional cu musica, paradanan y presentacionnan.
E hendenan ta celebra nan libertad y ta corda e historia di slabernia.
Nan ta celebra tambe nan cultura y e importancia di biba den libertad.
👨🏾⚖️ Sir Lynden Pindling – e “Tata di Nacion”
Na 1967, Sir Lynden Pindling a bira e promé premier di color preto di Bahamas.
E a yuda su pais pa bira independiente di Gran Bretaña na 1973.
Pesey hopi hende ta yam’e e “Tata di Nacion”.
Pindling a keda premier durante mas di 25 aña.
Durante su gobernacion, tabatin cambionan importante, manera mihor scolnan y hospitalnan.
Na 1965, e a duna un discurso masha famoso. E a bisa cu tabata tempo pa “cambia e reglanan di wega”.
Cu esaki e kier a bisa cu tur hende mester tin e mesun oportunidadnan y derechonan.
E tabata lucha pa igualdad y husticia.
📚 Palabranan dificil
Discurso: Ora un hende ta papia dilanti di hopi hende pa duna un mensahe importante.
Archipielago: Un grupo di islanan cu ta keda cerca di otro.
Colonisacion: Ora un pais ta tuma control di un territorio y ta manda riba e lugar ey.
Emancipacion: Ora hende ta haya nan libertad despues di un tempo di opresion, manera slabernia.
Independencia: Ora un pais por goberna su mes y no ta depende mas di otro pais.