Tarea 🇧🇸 Bahamas: Un paraiso di islanan yen di color, naturalesa y musica 🌴🌞 (Geografia/Conocemento di Naturalesa) (Resúmen)
🇧🇸 🏝️ E islanan di Bahamas
Bahamas ta un pais den Oceano Atlantico.
E pais tin mas di 700 isla grandi y chikito. Tur e islanan aki hunto ta forma un archipielago. Esaki ta un grupo di islanan cu ta keda cerca di otro.
No ta riba tur e islanan tin hende ta biba.
☀️ Clima tropical y turismo
Na Bahamas, casi semper ta haci calor y tin hopi solo.
E islanan tin beachnan cu santo blanco y awa blauw y cla.
Pesey hopi turista di henter mundo ta bishita Bahamas. Nan ta bin pa sosega, landa, sambuya y disfruta di naturalesa.
🎭 Junkanoo: Un fiesta special
Junkanoo ta un fiesta masha famoso na Bahamas.
Nan ta celebra e fiesta aki dia 26 di december y 1 di januari.
E fiesta a cuminsa hopi aña pasa, durante e tempo di slabernia. E tempo ey, hopi hende cu tabata esclavisá tabata haya algun dia liber pa celebra.
Awendia, hende ta celebra Junkanoo cu musica, baile y disfraznan di tur color.
- E disfraznan ta traha cu man, cu pluma, papel y decoracionnan cu ta briya.
- Cada aña, e paradanan tin un tema diferente.
- Hende ta toca tambor, cencerro y instrumentonan di soplo.
Ta un fiesta yen di musica y alegria!
🐠 Naturalesa y animalnan special
Na Bahamas tin hopi rif di coral. Esakinan ta lugarnan den laman caminda hopi animal ta biba.
Aki bo por haya piscanan di tur color, turtuganan di laman y dolfijnnan.
Riba un isla cu yama Big Major Cay, tambe conoci como Pig Beach, tin porconan cu ta landa den laman. 🐷🌊
Hopi turista ta bishita e isla pa wak e porconan aki!
🌪️ Horcannan y preparacion
Bahamas ta keda den un region cu nan ta yama Hurricane Alley.
Den e region aki por tin tormentanan tropical y horcannan.
Un horcan ta un tormenta cu bientu masha fuerte y hopi yobida.
Pesey e hendenan ta traha casnan fuerte y ta prepara un plan di evacuacion.
Un plan di evacuacion ta splica unda bo mester bay ora tin peligro.
🌊 Dean’s Blue Hole: Un buraco masha profundo
Na Bahamas tin un lugar special cu yama Dean’s Blue Hole.
Ta un buraco blauw masha profundo den laman.
E tin mas di 200 meter di profundidad. Esaki ta casi mes profundo cu 50 girafa poni un riba otro!
Hopi hende di henter mundo ta bin aki pa sambuya.
Algun sambuyadó ta baha sin tanki di aire. Nan ta usa solamente e aire cu nan tin den nan pulmonnan.
Esaki ta masha dificil y peligroso. Solamente hende cu tin hopi entrenamiento mester haci esaki.
📚 Palabranan dificil
Slabernia: Un tempo cu hende no tabatin libertad y tabata obligá pa traha.
Archipielago: Un grupo di islanan cu ta keda cerca di otro.
Rif di coral: Un lugar den laman caminda coral y hopi animal ta biba.
Horcan: Un tormenta cu bientu masha fuerte.
Fenomeno natural: Algo special cu ta pasa den naturalesa.
Plan di evacuacion: Un plan pa bay un lugar sigur ora tin peligro.